നോട്ട് നിരോധനത്തിന് ശേഷം, ഇന്ത്യയിലെ ഡിജിറ്റല് പേയ്മെന്റുകളുടെ തുക ഓരോ വര്ഷവും ശരാശരി 50 ശതമാനം എന്നനിരക്കിലാണ് വളര്ന്നിട്ടുള്ളത്. ഈ നേട്ടത്തിന് കാരണം നാഷണല് പേയ്മെന്റ് കോര്പ്പറേഷന് ഓഫ് ഇന്ത്യ (എന്.പി.സി.ഐ.) വികസിപ്പിച്ചെടുത്ത യൂണിഫൈഡ് പേമെന്റ് ഇന്റര്ഫേസ് (യു.പി.ഐ.) എന്ന സംവിധാനമാണ്.
ഒരു ബാങ്ക് അക്കൗണ്ടില്നിന്ന് മറ്റൊന്നിലേക്ക് വേഗതയിൽ പണം കൈമാറ്റം ചെയ്യാന് കഴിവുള്ള പേയ്മെന്റ് സംവിധാനമാണ് യു.പി.ഐ. പേ ടിഎം, ഫോണ് പേ, ഗൂഗിള് പേ, ആമസോൺ പേ, ഭാരത് പേ എന്നീ തുടങ്ങിയ പേയ്മെന്റ് ആപ്പുകള് പ്രവര്ത്തിക്കുന്നത് യു.പി.ഐ. എന്ന പ്ലാറ്റ്ഫോറത്തില്. നിലവില് 58 യു.പി.ഐ. ആപ്പുകള് ഇന്ത്യയില് പ്രവര്ത്തിക്കുന്നുണ്ട്. കഴിഞ്ഞ മാര്ച്ചില്മാത്രം ഏകദേശം 868.53 കോടി യു.പി.ഐ. ഇടപാടുകള് നടത്തപ്പെട്ടിരുന്നു.
വിനോദസഞ്ചാരത്തിലും യു.പി.ഐ കൊണ്ടുവന്ന മാറ്റങ്ങള് വലുതാണ്. പണമിടപാടുകള് എളുപ്പത്തിലാക്കാനും, കറന്സികള് കൊണ്ടുനടക്കുമ്പോഴുള്ള ബുദ്ധിമുട്ടുകള് ഒഴിവാക്കാനുമെല്ലാം യു.പി.ഐ വലിയരീതിയില് സഹായിച്ചു. ഡിജിറ്റല് പേയ്മെന്റുകള് വ്യാപകമായതോടെ ടൂറിസം പ്രവര്ത്തനങ്ങളില് വലിയ രീതിയിലുള്ള കുതിച്ചുചാട്ടമുണ്ടായതായി പല പഠനങ്ങളിലും വ്യക്തമായിട്ടുണ്ട്.
എന്നാല് വിദേശയാത്രകളില് യു.പി.ഐ ഉപയോഗിക്കാന് കഴിയാതിരുന്നതാണ് പല യാത്രക്കാരെയും വലയ്ക്കുന്ന ഘടകങ്ങളിലൊന്ന്. എന്നാലിപ്പോള് ചില രാജ്യങ്ങളില് യു.പി.ഐ സേവനങ്ങള് നിലവിലുണ്ട്. നിരവധി രാജ്യങ്ങളില് വൈകാതെ ഇത് സ്വീകരിച്ചു തുടങ്ങും.
ഭൂട്ടാന്
കേന്ദ്ര സര്ക്കാര് യു.പി.ഐ ആഗോള തളത്തില് വളര്ത്താനായി പലതരത്തിലുള്ള പ്രചാരണങ്ങള് നടത്തിയിരുന്നു. അതിന്റെ ഭാഗമായാണ് ചില രാജ്യങ്ങള് യു.പി.ഐ സേവനങ്ങള് അംഗീകരിച്ചു തുടങ്ങിയത്. ഇത്തരത്തില് ഭീം ആപ്പ് വഴിയുള്ള യു.പി.ഐ സേവനങ്ങള് ആദ്യം അംഗീകരിച്ച രാജ്യങ്ങളിലൊന്ന് ഭൂട്ടാനാണ്.
ഇന്ത്യക്കാര് ഏറ്റവും കൂടുതല് പോകുന്ന വിദേശരാജ്യം കൂടിയായ ഭൂട്ടാന് ഇന്ത്യയുമായി പലകാര്യങ്ങളിലും സഹകരിക്കുന്ന അയല്രാജ്യമാണ്. റോഡ് മാര്ഗവും ഇന്ത്യയില് നിന്ന് പോകാവുന്ന ഭൂട്ടാനില് പലപ്പോഴും ഇന്ത്യന് കറന്സിയും സ്വീകരിക്കാറുണ്ട്. യു.പി.ഐ കൂടെ നിലവില് വന്നതോടെ സന്തോഷങ്ങളുടെ നാട്ടിലേക്കുള്ള യാത്ര കൂടുതല് ആസ്വാദ്യകരമാവും.
യു.കെ
നാഷണല് പെയ്മെന്റ് കോര്പ്പറേഷന് ഓഫ് ഇന്ത്യ യു.കെയിലെ ഇ-പെയ്മെന്റ് പ്രൊവൈഡറായ പി.പി.ആര്.ഒയുമായി ധാരണാപത്രം ഒപ്പിട്ടത് മാസങ്ങള്ക്ക് മുന്പാണ്. ഇതോടെ ബ്രിട്ടണിലും വൈകാതെ തന്നെ യു.പി.ഐ സേവനങ്ങള് നിലവില് വരും. ഇന്ത്യക്കാര് ഏറ്റവും കൂടുതല് സന്ദര്ശിക്കുന്ന രാജ്യങ്ങളിലൊന്നും നിരവധി ഇന്ത്യന് വിദ്യാര്ഥികളുള്ള രാജ്യവുമായ യു.കെയില് ഇ.കൊമേഴ്സ് മേഖലയിലായിരിക്കും യു.പി.ഐ സേവനങ്ങള് സ്വീകരിക്കപ്പെട്ട് തുടങ്ങുക.
യു.എ.ഇ
ലക്ഷക്കണക്കിന് ഇന്ത്യക്കാര് താമസിക്കുകയും സന്ദര്ശിക്കുകയും ചെയ്യുന്ന രാജ്യമാണ് യു.എ.ഇ. 2022 മുതലാണ് ഭീം ആപ്പിലൂടെയുള്ള യു.പി.ഐ സേവനങ്ങള് യു.എ.ഇയില് നിലവില് വന്നത്. ദുബായ് ഉള്പ്പടെയുള്ള വിനോദസഞ്ചാര കേന്ദ്രത്തിലേക്ക് എത്തുന്ന ഇന്ത്യന് സഞ്ചാരികള്ക്കും യു.എ.ഇയില് പ്രിയപ്പെട്ടവരെ കാണാനായി പോകുന്നവര്ക്കും ഒരുപോലെ ഉപകാരപ്രധമാണ് ഇത്.
ഒമാന്
ഏറെ ഇന്ത്യക്കാര് സന്ദര്ശിക്കുന്ന മറ്റൊരു ഗള്ഫ് രാജ്യമായ ഒമാനും 2022 ഒക്ടോബര് മുതല് യു.പി.ഐ സ്വീകരിക്കുന്നുണ്ട്. ഒമാന്റെ ഇ-പെയ്മെന്റ് സംവിധാനവുമായി യു.പി.ഐ ലിങ്ക് ചെയ്യാനുള്ള കരാറും എന്.പി.സി.ഐയുമായി ഒമാന് ഒപ്പിട്ടിരുന്നു. സെന്ട്രല് ബാങ്ക് ഓഫ് ഒമാനുമായും ഇന്ത്യ ഈ വിഷയത്തില് ധാരണ പത്രത്തില് ഒപ്പുവെച്ചിരുന്നു.
ഫ്രാന്സ്
പ്രധാനമന്ത്രി നരേന്ദ്ര മോദിയുടെ ഫ്രാന്സ് സന്ദര്ശനത്തോടെയാണ് ഫ്രാന്സിലും യു.പി.ഐ ലിങ്ക് ചെയ്യാനുള്ള സാഹചര്യമൊരുങ്ങിയത്. ഫ്രാന്സില് യു.പി.ഐ ഉപയോഗിക്കാന് ഇന്ത്യയും ഫ്രാന്സും തമ്മില് ധാരണയായതായി പ്രധാനമന്ത്രി വ്യക്തമാക്കിയിരുന്നു. ഫ്രാന്സിന്റെ ഓണ്ലൈന് പേയ്മെന്റ് സംവിധാനമായ ലൈറയുമായി നാഷണല് പേയ്മെന്റ് കോര്പ്പറേഷന് ഓഫ് ഇന്ത്യ ധാരണാപത്രം ഒപ്പുവെച്ചു. ഫ്രാന്സിലെ പ്രധാന വിനോദസഞ്ചാര കേന്ദ്രമായ ഈഫല് ടവറില് ഉള്പ്പടെ യു.പി.ഐ പേയ്മെന്റ് നടത്താനാകും.
യൂറോപ്യന് രാജ്യങ്ങള്
വൈകാതെ യൂറോപ്പിലെ ഒന്നിലേറെ രാജ്യങ്ങളിലൂടെയുള്ള യാത്രകളിലും യു.പി.ഐ പേയ്മെന്റ് നടത്താന് സാധിച്ചേക്കും. എന്ഐപിഎല് യൂറോപ്യന് പണിടപാട് സേവന ദാതാവായ വേള്ഡ് ലൈനുമായി ഇതുസംബന്ധിച്ച് ധാരണയിലെത്തിയിട്ടുണ്ട്. വേള്ഡ് ലൈനിന്റെ ക്യൂആര് കോഡ് അടിസ്ഥാനമാക്കിയുള്ള സംവിധാനംവഴി യൂറോപ്പില് ഷോപ്പിങ് നടത്താന് സംവിധാനംവഴി കഴിയും.
അതോടൊപ്പം റൂപെ ഡെബിറ്റ്, ക്രെഡിറ്റ് കാര്ഡുകള് വഴി യൂറോപ്യന് രാജ്യങ്ങളില് പണമിടപാട് നടത്താനുമാകും. എല്ലാ യൂറോപ്യന് രാജ്യങ്ങളിലേയ്ക്കും താമസിയാതെ സംവിധാനം വ്യാപിപ്പിക്കുമെന്ന് നാഷണല് പേയ്മെന്റ് കോര്പറേഷന് അറിയിച്ചിരുന്നു.
തെക്കുകിഴക്കന് ഏഷ്യന് രാജ്യങ്ങള്
രാജ്യാന്തര ഡിജിറ്റല് പെയ്മെന്റ് കമ്പനിയായ ലിക്വിഡ് ഗ്രൂപ്പുമായി സഹകരിച്ചുകൊണ്ടാണ് എന്.ഐ.പി.എല് സൗത്ത് ഏഷ്യന് രാജ്യങ്ങളില് യു.പി.ഐ അവതരിപ്പിച്ചത്. ഇതിലൂടെ സിങ്കപ്പൂര്, മലേഷ്യ, വിയറ്റ്നാം, തായ്ലന്ഡ് തുടങ്ങിയ പത്തോളം രാജ്യങ്ങളില് വൈകാതെ യു.പി.ഐ ഉപയോഗിക്കാനാവും.
Content Highlights: Countries where travellers can pay through UPI Bhutan, UK, UAE, France.